Алматылық дәрігерлер магнит жұтып қойған екі баланы аман алып қалды
АЛМАТЫ. KAZINFORM – Алматының балалар шұғыл медициналық көмек орталығының дәрігерлері қаңтар және ақпан айында ұсақ магниттерді жұтып қойған екі балаға шұғыл ота жасады.
Қалалық денсаулық сақтау басқармасының мәліметінше, 4 қаңтарға қараған түні іші қатты ауырған екі жасар сәби Балаларға жедел медициналық көмек көрсету орталығының қабылдау бөліміне түсті.
– Кішкентай науқастың ауруханаға түскен кездегі жағдайы ауыр деп бағаланды. Біз жедел төмен ішек өтімсіздігін, перитонит және инфекциялық-уытты шокты анықтадық. Баланың ішегінен 13 ұсақ магнитті көрдік, - деді қабылдау бөлімінің жауапты хирургі Азат Мамырасыл.
Балаға шұғыл түрде операция жасалды.
– Біз ортаңғы лапаротомия жасап барлық 13 магнитті аш ішектен шығардық. Операциядан кейін бала реаниматологтардың бақылауымен қарқынды терапия бөлімінде біраз уақыт болды. Содан кейін ол бейіндік бөлімге ауыстырылды, ал бір аптадан кейін үйіне шығарылды, - деді хирург.
Екінші жағдайда, 7 жастағы бала ішкі ағзасындағы магнит ойыншықтармен 9 күн жүрген.
– Бала 27 қаңтардан бастап ауырған. Ата-анасы баласының жағдайы нашарлағаннан кейін жеке клиникаға апарған. Ол жерде рентгенге түсіріп, ішегінде бөгде заттың барын анықтаған. Дәрігерлер ауруханаға жүгіну қажет екенін ескерткен, бірақ ата-анасы баланың жағдайын өз бақылауларына алған, – деді Азат Мамырасыл.
Күн өткен сайын баланың халі нашарлай түскен. 4 ақпанда баланың іші қатты ауырып, әлсіреп, күніне 15 ретке дейін құсқан. Тек осы кезде ғана оның жақындары жедел жәрдем бригадасын шақырып, шұғыл түрде балаларға жедел медициналық жәрдем көрсету орталығына алып келген.
– Біз балаға күрделі операция жасадық. Іштегі магнитті алып тастадық. Қуанышқа орай, баланы аман алып қалдық. Қазір ол толық сауығып, ауруханадан шығарылды, - деп атап өтті дәрігер.
Осыған дейін, Ақмола облыстық балалар ауруханасының хирургтары төрт жастағы баланың ішінен 39 түйір магниттік моншақты алып шығып, бүлдіршіннің өмірін сақтап қалды.
