Алматының гидрологиялық бекеттеріне капсула үйлер қойылды
АЛМАТЫ. KAZINFORM – Алматы қаласындағы Үлкен Алматы шатқалындағы Күмбелсу гидробекетінде капсула үйлер ашылды.
Алматы қалалық Төтенше жағдайлар департаментінен мәлім еткендей, жаңа капсулалық үйлер теңіз деңгейінен 2 мың метр биіктікте қойылды. Тау өзендеріндегі су деңгейін бақылайтын қызметкерлер мұнда қысы-жазы болады. Тәулік бойы мониторинг жүргізеді.
– Жаңа капсула үйлер заманға сай жасалған. Аумағы – 24 шаршы метр. Ішінде жұмыс істейтін орын, жатын және жуынатын бөлмесі бар. Ал, жылу мен жарық автономды түрде беріледі. Қажетті жиһазбен жабдықталған, - деп хабарлады департаменттен.
Ведомстовадан бақылау бекетінің аумағында көшеттер отырғызылатынын атап өтті.
Еске салайық, осыған дейін Алматы тауларында адасқан туристер үшін үйшіктер орнатылған болатын.
Айта кетейік, үйшіктер құтқарушылармен шұғыл байланыс жүйесімен жабдықталған, оларда алғашқы көмек апаттық жиынтығы – алғашқы медициналық көмек қобдишасы, мобильді құрылғыларды зарядтау стансасы, жылы көрпе және бұзылмайтын азық-түлік жиынтығы (сіріңке, тез дайындалатын кеспе, крекер, банкадағы ботқа, отын) бар. Арнайы үйшіктер алыстан көзге бірден шалынатын ашық қызғылт сары түске боялған.
