Алматының коммуналдық қызметі күшейтілген режимде жұмыс істейді
Алматы қаласында бүгін сағат 10.00-ден бастап жауған жаңбыр таңға дейін жауады деп болжанып отыр, деп хабарлайды Kazinform.
"Судың кедергісіз ағуын қамтамасыз ету, ықтимал су басудың алдын алу және жою мақсатында 46 патрульдік бригада, 165 арнайы техника, 26 мотопомпа және 684 жұмысшысы жұмылдырылды. Су басуы мүмкін орындарды қоршау үшін шамамен 2 мың қап құм дайындалды", - деп жазды Алматы қаласының коммуналдық инфрақұрылымды дамыту басқармасы.
Төтенше жағдайлар жөніндегі жедел кезекшінің ақпараты бойынша су тасқыны тіркелген жоқ.
Түнгі уақытта 114 арнайы техника, 23 мотопомпа және 115 адам жұмыс істеуге шығады деп жоспарланған.
Аудан әкімдіктерінде тәулік бойы кезекшілік ұйымдастырылды.
"Қазгидромет" РМК болжауынша, Алматы қаласында түнде тұман түсіп, 1-2 мм-ге дейін жауын-шашын болуы мүмкін. Желдің екпіні - 2-7 м/с. Түнде ауа температурасы +4...+6 градус, ертең күндіз жауын-шашынсыз +14...+16.
