Алматы әкімдігінің ғимаратында тағы да өрт болды - ТЖМ
деп хабарлайды ҚР ТЖМ.
Ведомство баспасөз қызметінің мәліметіне сәйкес, қаңтардың 13-і күні сағат 10.32-де Бостандық ауданындағы Республика алаңы, 4-ші үйде орналасқан әкімдіктің техникалық қабатында №1-ші желдеткіш камерасындағы жылытқыштың жануы болды. Жалын 10 шаршы метр аумаққа тараған. «Құрбан болғандар мен зардап шеккендер жоқ. Ғимараттан 60 адам қауіпсіз жерге көшірілді», - деп атап өтті олар.
Тілсіз жау Алматы қаласы бойынша ТЖД өртке қарсы қызметінің 41 адамы мен 17 техникасының күшімен сағат 11.41-де ауыздықталды.
Естеріңізге сала кетейік, бұл - өткен тәулікте Алматы әкімдігінде орын алған екінші өрт. Қаңтардың 12-сінен 13-іне қараған түні сағат 01.14-те мекеменің 6-шы қабатында 30 шаршы метр аумақта баспасөз қызметінің кабинеті жанған еді. Құрбан болғандар мен зардап шеккендер жоқ. Жалынды сөндіруге өртке қарсы қызметінің 38 адамы мен 11 техникасы жұмылдырылған болатын.
