Алматы әуежайында болуы мүмкін жарылыс жөніндегі ақпарат салдарынан бортында 715 жолаушы бар 10 рейстің ұшырылуы кешіктірілді - ҚР БКП
АСТАНА. 21 қаңтар. ҚазАқпарат - Алматы әуежайында жарылғыш зат бар деп жалған ақпарат таратқан азаматқа қатысты қылмыстық іс қозғалды, деп хабарланды ҚР Бас көлік прокуратурасының баспасөз қызметінен.
Ағымдағы жылғы 19 қаңтарда шамамен сағат 16:00-де Алматы қаласы әуежайының полиция желісі бөлімшесіне Алматы қаласының халықаралық әуежайына жарылғыш зат қойылғаны және оның 20 қаңтарда сағат 12:00-де іске қосылатыны жөнінде ақпарат келіп түсті.
Жедел әрекет ету шаралары барысында әуежайдың қалыпты жұмысы бұзылды, соның салдарынан бортында 715 жолаушы бар 10 рейстің ұшырылуы және бортында 556 жолаушы бар 7 әуе кемесінің жерге қонуы кешіктірілді.
Бірлескен шаралар өткізу барысында жарылғыш заттар табылған жоқ.
Сағат 18.30-да әуежайдың қызметі қалпына келтірілді.
Жедел-іздестіру шарасы барысында кінәлі адам анықталды. ҚР ҚК-нің 242 бабы бойынша (лаңкестік актісі жөнінде көрінеу жалған ақпарат тарату) қылмыстық іс қозғалды.
Тексеру амалдарының барысы жіті бақылауға алынды.
