Алматы марафонына қатысушылардың саны 10 000-ға жуықтады - А.Есімов
АЛМАТЫ. ҚазАқпарат- Бүгін Алматы қаласында III Алматы марафоны басталды. Оған 10 000-ға жуық спортшы қатысуда. Олардың арасында әлемнің 25 елінен келген айтулы желаяқтар бар.
«Құрметті қатысушылар! Бүгінгі жарыс Халықаралық Марафондар Қауымдастығының қамқорлығымен өтіп жатыр. Арамызда осы ұйымның өкілдері бар. Өткен жылы қараша айында біздің Марафонды ұйымдастырушылардың делегациясы Афина қаласында Халықаралық Марафондар Қауымдастығының штаб-пәтерінде болып қайтқан еді. Міне, осы кездесудің арқасында өткен жылы желтоқсан айында біз Халықаралық мәртебе алдық. Енді біздің Марафонның мәртебесі Нью-Йорк, Лондон секілді ірі Халықаралық Марафондардың мәртебесімен бірдей болмақ. Бұрнағы жылы Марафонымызға 2500 адам қатысты. Өткен жылы қатысушылардың саны 6000 адамдай болды. Ал биыл, міне, қатысушылардың саны 10 000-ға жуықтады. Таяуда Париж Марафонына 40 000 адам қатысқан болатын. Ал біз енді осындай серпінмен алға жылжитын болсақ, көп ұзамай Париж Марафонына жетіп, одан басып озатын боламыз» - деді қала әкімі Ахметжан Есімов.
Естеріңізге сала кетейік, аталмыш марафон 2012 жылдың 27 мамырынан бастап, қоғамдық марафондар өткізіп тұратын ірі әлемдік астаналарадың қатарына енді.
Жүгірістер 3 шақырым, 10 шақырым, 21 шақырым, эстафеталық «экиден» және 42 шақырым 195 метр қашықтықта болып жатыр.
Марафонның басты демеуші серіктестері: «Astana Group» компаниялар тобы, «Қазақстан халық банкі», MEGA сауда-ойын-сауық орталығы, Adidas компаниясы және тағы басқалар.
Жарыс аяқталған соң жеңімпаздарға мақтау қағаздары, медальдар және бағалы сыйлықтар табыс етіледі.
