Алматыда бокстан Халық Қаhарманы Қайрат Рысқұлбековті еске алуға арналған Халықаралық турнир басталды

АЛМАТЫ. ҚазАқпарат- Алматыда Қазақ спорт және туризм академиясында бокстан студент жастар арасында Халық Қаhарманы Қайрат Рысқұлбековті еске алуға арналған Халықаралық турнир басталды.

«Бес күнге созылатын бұл жарысқа барлығы 120 боксшы қатысуда. Олардың ішінде 3 боксшы Қырғызстаннан тағы үшеуі Өзбекстаннан келді. Біріккен Араб Әмірлігінен де келуі керек еді. Бірақ, өкінішке қарай келе алмай қалды. Осымен 14-ші рет өткізіліп отырған бұл турнир Халық Қаhарманы Қайрат Рысқұлбековті еске алуға және осы Қазақтың спорт және туризм академиясының 70 жылдық мерейтойына арналып отыр», - деді өз сөзінде қазақтың аталмыш жоғары оқу орнының бокс және ауыр атлетика кафедрасының меңгерушісі Мұстафа Қасымбеков.

Естеріңізге сала кетейік, үстіміздегі жылы 7 қыркүйекте Ресейдің Якутск қаласында бокстан студенттер арасында әлем біріншілігі өтеді. Сол чемпионатқа баратын қазақстандық былғары қолғап шеберлері осы турнирде іріктелетін болады.