Алматыда еліміздің 2020 жылға дейінгі стратегиялық даму барысы талқыланды

Жиынға Алматы қаласы мәслихатының депутаттары, құрылымдық бөлімшелердің басшылары, денсаулық сақтау, білім беру, қоғамдық ұйымдар мен этно-мәдени бірлестіктердің, бизнес- құрылымдардың өкілдері қатысты.

Кеңесте Алматы қаласының әкімі стратегия ережелері болашақта Қазақстанның ең дамыған, қуатты, халқының тұрмыс жағдайы жоғары мемлекет деңгейіне көтерілетіндігін атап өтіп :«Біздің қала экономикасы қарышты қадаммен дамуда, 2010 жылдың қорытындысы бойынша тұңғыш рет экономикаға қаржы бөлу көлемі артты. Осының арқасында өнеркәсіптік өндіріс көлемі 27 пайызға өсті, бұл бұрын-соңды болмаған жетістік», - деді Ахметжан Есімов.

Әкім сонымен қатар, Алматыда орта және кіші бизнестің тұрақты дамып отырғандығын, жұмыспен қамтудың 3%-ға өскендігін, өнім шығару мен қызмет көрсетудің 9%-ға артқандығын айтты. "Әлеуметтік салада да оң өзгерістерге қол жетті. Жұмыссыздық деңгейі 0,7% дан 0,4% -ға төмендеді. Жалақы 5% -ға өсті",-деді қала басшысы. Ол мегаполистің алдағы даму барысына да кеңінен тоқталып өтті.

2015 жылға дейінгі индустриалды-экономикалық даму барысын жүзеге асыра отырып, Алматыда жалпы өнім өндіру 30%-ға өсетін болады. Алатау ауданында индустриалдық аймақ құрылып, информациялық технология паркінің, индустриялды - инновациялық дамудың қарқыны өседі, ал өнеркәсіптің үлес салмағы 8-10%-ға артады. Инновациялық өнім шығару екі есеге ұлғаяды. Туристік қызмет көрсету 10%-ға өсетін болады делінді кеңесте.

Әкім денсаулық және білім беру саласындағы, тілдерді дамыту жөніндегі міндеттерге де тоқталды. Ол жоғары оқу орындарында инновациялық қыз- метті, әлеуметтік бәсекелестікті дамыту ісіне де ерекше көңіл бөлді.

Қала басшысы сондай-ақ, Алматы «Балапан» бағдарламасын дамытуда оң нәтижелерге қол жеткенін айта келіп, "2015 жылы бала бақшаның жетіспеушілігі мүлдем болмайды",- деді.