Алматыда скринингтің арқасында 400-ге жуық сәбиден ретинопатия анықталды
АЛМАТЫ. ҚазАқпарат – Былтыр шала туған нәрестерелге жүргізілетін скринингтің арқасында 400-ге жуық сәбиден ретинопатия анықталды. Олардың 80 пайызына уақытында ота жасалып, соқырлықтың алды алынды. Бұл туралы Өңірлік коммуникациялар қызметінің алаңында өткен баспасөз мәслихатында Алматы қаласы Қоғамдық денсаулық сақтау басқармасының штаттан тыс балалар бас неонатологы Елена Плужникова мәлім етті, деп хабарлайды ҚазАқпарат тілшісі.
Оның айтуынша, шала туған нәрестелерді скринингтік тексеруде қолданылатын жаңа әдістер мүгедектіктің алдын алуға мүмкіндік береді. Қазір перзентханаларда шала туған нәрестелер үшін ретинопатия (көздің тор қабығының дамымауы) скринингі жүргізіледі. Егер бала мерзімінен бұрын дүниеге келсе, онда көздің тор қабығы дамып үлгермейді. Ол біртіндеп қалыптасады, бірақ жатыр ішінде дамуына қарағанда, агрессивті жағдайларда қалыптасатын болады. «Бүгінде Алматының балалар офтальмологтары ретинопатиясы бар балаларға шұғыл ем жасауда. Сол себепті де ерте босанып қою салдарынан көзі көрмейтін балалар саны айтарлықтай азайды. Өткен жылы шала туылған нәрестелер арасында ретинопатияның 400-ге жуық жағдайы анықталды, олардың 80 пайызына ота жасалды»,- дейді дәрігер. Сонымен қатар, ол скринингтің арқасында былтыр есту қабілеті бұзылған 44 жаңа туған нәресте анықталғанын атап өтті. Сондай-ақ 2 фенилкетонурия және 5 туа біткен гипотиреоз анықталды. «Фенилкетонурия - белгілі бір амин қышқылын өңдей алмаған кезде бауыр ферменттерінің жеткіліксіздігінен болатын тұқым қуалайтын ауру. Бұл амин қышқылы емшек сүтінде және бірқатар тағамдарда кездеседі. Бала туылған кезде, оның денсаулығында мұндай ақаудың бар-жоғын сыртынан клиникалық түрде анықтау мүмкін емес, бірақ баланы анасы кеудесіне салып, емізеді және содан кейін қосымша тағамдар енгізіледі, қиындықтар осы кезде туындайды. Егер заттар дұрыс ыдырамайтын болса, ол нәрестенің миына әсер етеді», - дейді педиатр-неонатолог.
Оның айтуынша, сол үшін перзентхана кезеңінде скрининг жүргізіледі: жаңа туған нәрестенің өкшесінен қан алынып, генетикалық орталыққа жіберіледі. Туа біткен гипотиреозге скрининг осындай принциппен жүргізіледі. «Егер диагноз анықталса, онда фенилкетонурия үшін диеталық терапия, ал туа біткен гипотиреоз үшін өмір бойына гормондарды алмастыру терапиясы қолданылады. Сондай-ақ есту қабілетінің бұзылуын дер кезінде анықтау мақсатында жаңа туған нәрестелерді аудиологиялық тексеру жүргізіледі. Ауыр жағдайда туған балаларды қоспағанда, барлық балалар осы скринингтен өтеді. Бұл ауыртпай жасалатын шара. Алматыың әрбір перзентханасында арнайы аудиометр бар, оны баланың құлағына салу арқылы сигналды тіркейді. Егер екі құлағы сигналды өткізбейтінні анықталса, баланы сурдологиялық кабинет тіркеуіне қояды», - деп жалғастырды Елена Плужникова. Спикердің сөзінше, бұл – маңызды скрининг, себебі есту қабілеті баланың сөйлеуі мен оның физикалық дамуымен бікелей байланысты. Айта кетейік, 2022 жылы Алматыда 50 мыңға жуық нәресте дүниеге келген.Фото: Алматы қаласының Өңірлік коммуникациялар қызметі
