Алматылық волейболшы қыздар ел чемпионатында қарсылас шақ келтірмеуде
АЛМАТЫ. 16 ақпан. ҚазАқпарат - Волейболдан жоғары лиганың «Б» тобындағы әйелдер командалары арасында Алматы қаласының «Алматиночкасы» Қазақстан чемпионатының 3-ші турында да жеңістер сериясын жалғастыруда.
Астанада 13 ақпан күні басталған бұл сайыста бүгін олар Оңтүстік Қазақстан облысының «Қазығұрт» командасымен кездесуде. Олар бұған дейінгі 2 турда қарсыласын 3:1 есебімін ұтқан болатын. Ертең енді 3-ші турдың ақтық ойынын бұған дейін 2 мәрте 3:0 есебімен ойсырата ұтқан Солтүстік Қазақстан облысының «Қуаныш и К» командасымен өткізбек.
Қазір 13 кездесуден кейін 39 ұпаймен алматылық қыздар турнир кестесінде көшбасшылық тізгінді берік ұстауда. Одан кейінгі орындарға сәйкесінше 28 ұпаймен «Қазығұрт», 23 ұпаймен «Қуаныш и К», 12 ұпаймен «Жетісу-2» (Алматы облысы), 11 ұпаймен «Оқушылар сарайы» (Астана қаласы) және 4 ұпаймен «ЦСКА-ВКС-КазАСТ» (Алматы қаласы) орналасты.
