Аралас жекпе-жек шебері Жасұлан Әкімжан келесі қарсыласын атады
«Бүгінгі турнирге дайындықты ойдағыдай өткіздік. Ешқандай қиындық болған жоқ. Қазақ елінің қолдауының арқасында бүгін жеңіске жеттік. Әрине, үзілістен кейін қиындық болды, салмақ жағынан. Дегенмен бәрі ойдағыдай өтті. Алдағы қарсыласым қазірдің өзінде белгілі. Ол - дағыстандық Расул Магомедов. Қазір Eagle FC белбеуі сол жігітте. Сол белбеуді қазақ еліне әкеліп қуантсам деген мақсат бар», - деді Жасұлан Әкімжан елордада аралас жекпе-жектен өткен турнирдегі жеңісінен кейін.
Сондай-ақ, жерлесіміз дағыстандық спортшымен жекпе-жекке шығуға дайын екендігін айтты.
«Жанкүйерлерге айтарым, қазақстандық жекпе-жек шеберлеріне деген қолдауын аямаса. Жалпы барлық спортшыларға халықтан қолдау керек», - дейді ол.
Бұған дейін хабарлағанымыздай Жасұлан Әкімжан Eagle FC 50 турнирінде ресейлік Руслан Яманбаевты техникалық нокаутпен жеңген еді.
Сондай-ақ, аталған бәсекеде қазақстандық Әли Қабдолла тұншықтыру әдісін қолдана отырып қарсыласынан басым түскен еді.