Арыстанбек Мұхамедиұлының аштық жариялағаны рас па

АСТАНА. KAZINFORM – Кеше бұрынғы Мәдениет және спорт министрі Арыстанбек Мұхамедиұлының әлеуметтік желідегі жеке парақшасында аштық жариялағаны туралы ақпарат шықты.

11 жылға сотталған экс-шенеунікке қатысты істің мән-жайын Қылмыстық-атқару жүйесі комитетінен сұраған едік.

- Сотталушының аштық жариялауы туралы ақпарат шындыққа жанаспайды. Ол тамақ ішеді, бұл жағдай бейнебақылау камераларының жазбасымен расталады. Сотталушыдан арыз-шағым түскен жоқ. Сонымен қатар белгіленген тәртіп бойынша сотталған адамға ұялы телефон берілмейді, - делінген Ақмола облыстық қылмыстық-атқару жүйесі департаментінің хабарламасында. 

Сондай-ақ ресми ақпаратта Арыстанбек Мұхамедиұлының атынан әлеуметтік желіде жалған жазба жариялау фактісі бойынша тексеру жүргізілетіні айтылған. 

- Жалған ақпарат таратқаны үшін жауапкершілік қарастырылған, - деп ескертілді мекемеден.

 Еске сала кетсек, бұрынғы Мәдениет және спорт министрі, ұлттық музей директоры Арыстанбек Мұхамедиұлы 2022 жылы мамырда қамауға алынды.

Антикор музей басшысына «Алтын адамның әлем музейлеріне шеруі» халықаралық көрмесін өткізу барысында қаржы жымқырды деген айып тақты. 

Былтыр ақпанда Арыстанбек Мұхамедиұлы 11 жылға бас бостандығынан айырылды. 

Дегенмен Арыстанбек Мұхамедиұлы сотта кінәсін мойындамады.

Өткен жылы тамызда Апелляциялық сот Арыстанбек Мұхамедиұлына қатысты үкімді қайта қарады. 

Айта кетсек, Арыстанбек Мұхамедиұлына тиесілі спорт мектебі мемлекетке қайтарылды.