Арменияда 100-ден аса қазақстандық кәсіпорын тұрақты жұмыс істейді

АСТАНА. KAZINFORM — Арменияда қазақстандық капиталдың қатысуымен 100-ден аса кәсіпорын тұрақты жұмыс істейді. Бұл туралы Премьер-министрдің орынбасары — Сыртқы істер министрі Мұрат Нұртілеу айтты.

— Келіссөздер барысында ауыл шаруашылығы, ІТ-технологиялар мен жасанды интеллект, инфрақұрылым мен логистика және басқа да маңызды салалар бойынша ықпалдастықты кеңейтуге деген өзара қызығушылық таныттық. Сонымен бірге, екіжақты саудадағы шағын және орта бизнестің үлесін ұлғайту, іскерлік форумдарды өткізу тәжірибесін жандандыру мәселелеріне жіті тоқталдық. Қазіргі уақытта Қазақстанда 430-дан астам армян компаниясы тіркелген болса, Арменияда қазақстандық капиталдың қатысуымен 100-ден аса кәсіпорын тұрақты жұмыс істейді. Екі елдің тиімді іс-әрекеттестігі ортақ бизнесті дамытудың жаңа көкжиектерін ашып, өзара түйісу нүктелерін айқындайды, — деді ол Арменияның Сыртқы істер министрі Арарат Мирзоянмен кездесуде.

Сондай-ақ министр армениялық бизнес біздің елімізде қандай салаларда іс жүргізуге қызығушылық танытатынын атап өтті.

— Әріптестеріміздің «Қорғас» орталығында бажсыз сауда дүкендері желісін ұйымдастыруын толық құптаймыз. Бұған қоса, армениялық бизнес Қазақстанның өңірлерінде өз сауда павильондарын ашуды жалғастыруға ниет білдірді, — деді Мұрат Нұртілеу.

Еске сала кетейік, өткен жылдың соңында екі ел арасындағы достық қарым-қатынас тақырыбында ауқымды шара өткен болатын.