Аружан Сағындықова Қытайдағы турнирде жеңіс тұғырына көтерілді

АСТАНА. KAZINFORM — Қазақстандық теннисші, әлемнің 958-ракеткасы, 20 жастағы Аружан Сағындықова Луань (Қытай) ITF W15 турнирінің чемпионы атанды.

Қазақстандық спортшы финалда әлемнің 797, осы жарыстың 5-ракеткасы, 19 жастағы ресейлік спортшы Мария Калякинамен бас жүлдені сарапқа салды. 

Бірінші партияда Аружан 6:4 есебімен басымдық танытты. Екінші сетте де Сағындықова дүниежүзілік рейтингіде өзінен әлдеқайда жоғары тұрған қарсыласының мысын басты – 6:3. Осылайша, екі партияда қарсыласын сан соқтырған қазақстандық теннисші чемпиондық тұғырға көтерілді. 

Бұл жеңісінен кейін Аружан алдағы дүйсенбіде жаңартылатын WTA рейтингісінде жоғары көтерілері анық. 

Еске сала кетейік, бұдан бұрын Аружан Сағындықованың Қытайдағы турнирдің финалына жолдама алғанын жазған едік. 

Сондай-ақ белоруссиялық теннисші екінші жыл қатарынан АҚШ чемпионы болды.