Әскери лауазымдарға ұсыну тәртібі: кандидаттардың цифрлық рейтингі енгізілмек

АСТАНА. KAZINFORM — Парламент Мәжілісінің қарауына «Қазақстан Республикасының кейбір заңнамалық актілеріне әскери қызметшілердің құқықтық жағдайын жетілдіру, қорғаныс және әскери қызмет мәселелері бойынша өзгерістер мен толықтырулар енгізу туралы» заң жобасы енгізілді. 

— Заң жобасына Парламент депутаттары бастамашылық етті. Бұл құжаттың мақсаты — мемлекетіміздің қорғаныс және Қарулы күштері саласындағы заңнаманы жетілдіру. Мәселен, жоғары тұрған әскери лауазымдарға ұсыну үшін кандидаттардың цифрлық рейтингін енгізу ұсынылады. Қорғаныс министрлігінің халықаралық ұйымдар жанындағы әскери өкілдіктерінің қызметін регламенттейтін нормалар қамтылған, — деді депутат Айгүл Құспан Мәжілістің жалпы отырысында.

Сонымен қатар, заң жобасында әскери қызметті өткеру және әскерилерді әлеуметтік қамтамасыз ету мәселелерін реттейтін бірқатар норма ұсынылған.

— Олардың ішінде Конституциялық сот қабылдаған нормативтік қаулыларды іске асыруға бағытталған нормалар бар. Мәжілістің Халықаралық істер, қорғаныс және қауіпсіздік комитеті осы заң жобасы бойынша қорытынды әзірлеуге дайын, — деді Айгүл Құспан.

Айта кетейік, жақында елде әскери институттар мен госпитальдегі жұмыс барысы тексерілді.