Астана мен Алматы әуежайынан биометриялық сәйкестендіру арқылы ұшуға болады

АСТАНА. KAZINFORM – Енді әуе рейсінің уақыты шегерілсе, өтемақы төленеді. Көлік министрлігі авиатасымалдау саласына ерікті сақтандыру жүйесін енгізбек.

Ал әуежайларға биометриялық сәйкестендіру жүйесі орнатылады. Сол арқылы рейске тіркеліп, жеке деректерді e-gov қосымшасы арқылы басқаруға болады. Яғни, жолаушыларды тіркеу процесіне керек операциялар бір ғана іс-әрекетпен орындалады. Әзірге мұндай мүмкіндік тек Астана мен Алматы әуежайларында қолжетімді.

− Бұл жобамен қазір Көлік министрлігі, Цифрлық даму министрлігі және Астана мен Алматы әуежайлары айналысып жатыр. Биыл 2025 жылы қолданыстағы кестемізге сәйкес, тұрғындар осы екі қала арасында биометрия арқылы қатынап қалуы әбден мүмкін, − ҚР Көлік министрлігінің ресми өкілі Ләззат Стамғазиева Jibek joly телеарнасына берген сұхбатында.

Қазір елімізде 18 халықаралық және 6 өңірлік әуежай жұмыс істеп тұр. Терминалдардың дені жаңарып келеді. Былтыр Шымкент пен Қызылорда қалаларында су жаңа әуежайлар қолданысқа берілген. Соның арқасында Қазақстан халықаралық терминалдар рейтингінде ТОП-50 елдің қатарына қосылды.

Еске сала кетсек, Шығыс Қазақстан облысында Президент тапсырмасымен құрылысы басталған Катонқарағай мен Зайсандағы әуежайлар үшін авиация саласы бойынша мамандар даярланбақ.