Астанада азық-түлікті арзан бағамен қайдан алуға болады
АСТАНА. ҚазАқпарат - Астанада арзан бағамен тұрақтандыру қорындағы азық-түлік өнімдері сатылып жатыр, деп хабарлайды ҚазАқпарат Елорда Инфо сайтына сілтеме жасап.
Қалалық Инвестициялар және кәсіпкерлікті дамыту басқармасының мәліметіне сәйкес, өнімдер еліміздің әр аймағындағы ірі тауар өндірушілерден сатып алынған.
Бүгінгі таңда арзандатылған азық-түліктер «Шапағат» коммуналдық базарында, «Алма» супермаркеттер желісінде, «Азат» сауда үйінде сатылуда. Атап өтілгендей, мұнда картопты - 60 теңгеден (қала бойынша орташа баға - 85 теңге), қантты - 230 теңгеден (251 теңге), күрішті 190 теңгеден (268 теңге) алуға болады.
Айта кетейік, тұрақтандыру қорына өнімдер маусымаралық кезеңде бағаның қымбаттауына жол бермеу үшін сатып алынады.
