Астанада балабақшаларда 5800 сәбиге орын босады
АСТАНА. ҚазАқпарат - Бүгін Астанада балабақшаларға балалар қабылдау басталды. Бұл туралы Астана қалалық білім басқармасының бастығы Элмира Суханбердиева мәлім етті.
«Бізге әрбір балабақша босаған орын санын береді. Мәселен, «Әсем-ай» балабақшасында биыл 60 бала мектепке барады да, олардың орны босайды. Сол 60 орынға біздер кезекке байланысты балаларды қабылдаймыз. Осы жылы 5 800 балаға орын дайындап отырмыз»,- деді ол.
Оның атап өтуінше, 2014 жылдың соңына дейін 15 балабақшаны пайдалануға беру жоспарланған. Жалпы, мемлекеттік балабақшалардың бағасы өзгерген жоқ. Ол жылдағыдай 10-12 мың теңгені құрайтын болады.
Босаған орындардың 20-25 пайызына жеңілдік кезегінде тұрғандар, ал қалғанына 2-6 жас аралығындағы бүлдіршіндер қабылданады. Жеңілдік 1-2 топтағы мүгедек ата-аналардың балаларына, ата-ананың қамқорлығынсыз қалғанда сәбилерге, жетім балаларға, көпбалалы отбасынан шыққан балаларға, әскери қызметкерлердің балаларына беріледі.
Ал балабақшалардағы босаған орындарға балаларды қабылдау комиссиясы бүгіннен бастап 2 шілдеге дейін жұмыс істейді. Комиссия №61 орта мектепте сағат 15-00-ден 18-00-ге дейін 300 адамды қабылдайтын болады.
