Астанада М. Мақатаевтың мерейтойына арналған жас ақындар мүшайрасы өтеді

АСТАНА. 8 ақпан. ҚазАқпарат /Айнұр Кенебаева/ - Астанада 9 ақпанда ақияық ақын Мұқағали ақынның 80 жылдық мерейтойына арналған Қыранбыз қырандардан жаратылған» атты қалалық жас ақындар мүшайрасы өтеді.

Шараны С.Сейфуллин атындағы ҚАТУ-дің және қазақ тілі кафедрасының ұжымыбірлесе ұйымдастырмақ. Оған Астана қаласы Тілдерді дамыту департаментінің басшысы Оразгүл Асанғазықызы мен еліміздің атақты ақын-жазушылары қатысады деп күтілуде.

Ақынның бай мұрасын жастарға өнеге, ұрпаққа ұлағат етіп, рухы биік, таланты тегеурінді біртума тұлғаның биік рухына тағзым ету, сондай-ақ жүрегінде жалын бар жас жыр сүйер ұрпақтың дарынын танып, талабын шыңдау мақсатында қолға алынған бұл игі шараға 17-25 аралығындағы қарымды жас өнерпаздар қатысатын болады.

Мүшәйрада алғашқы үш орынды иеленген жеңімпаздарға ақшалай жүлделер тағайындалған.