Астанада өңірлік ауыл шаруашылығы жәрмеңкелері басталады
АСТАНА. KAZINFORM – Елордада 19-20 қыркүйек күндері өңірлердің қатысуымен өтетін ауыл шаруашылығы жәрмеңкелерінің сериясы басталып, алғашқы болып Қызылорда және Атырау облыстары өз өнімдерін ұсынады, деп хабарлайды Астана қаласы әкімдігінің ресми сайты.
Жәрмеңкеде елорда тұрғындары мен қонақтары ет, балық, сүт өнімдерін, көкөніс, жеміс-жидек және басқа да азық-түлік тауарларын отандық өндірушілер мен фермерлерден тікелей сатып ала алады.
– Жәрмеңке сағат 09:00-ден 18:00-ге дейін «Қазанат» ипподромының автотұрағында өтеді. Мекенжайы: Қарқаралы тасжолы, 1. Жәрмеңке өтетін жерге №18, 37 және 303 автобустармен баруға болады, – делінген әкімдік хабарламасында.
Өңірлік ауыл шаруашылығы жәрмеңкелері Астанада 25 қазанға дейін әр демалыс сайын ұйымдастырылады.
26-27 қыркүйекте Абай, Алматы және Маңғыстау облыстарының тауар өндірушілері өз өнімдерін ұсынады.
3-4 қазанда Шығыс Қазақстан және Ақтөбе облыстары, 10-11 қазанда Түркістан және Батыс Қазақстан облыстарының жәрмеңкесі өтеді.
17-18 қазанда Солтүстік Қазақстан, Павлодар және Ұлытау облыстарының өнімдері саудаға шығарылса, 24-25 қазанда жәрмеңке Қарағанды және Қостанай облыстарының қатысуымен қорытындыланады.
Айта кетейік, Астанада өтетін ауыл шаруашылығы жәрмеңкесінде өнімдер тиімді бағамен сатылатыны хабарланды.
