Астанада оңтүстіктің қауын-қарбызы тегін таратылатындығы туралы ақпарат жалған - әкімдік
АСТАНА. ҚазАқпарат - Астанада Оңтүстік Қазақстан облысынан әкелінген бақша өнімдері тегін таратылады деген ақпарат жалған. Бұл туралы елорда әкімдігінің медиа орталығынан мәлім етті, деп хабарлайды ҚазАқпарат.
«Елорда басшылығы мен ОҚО әкімдігі Астанадағы Оңтүстік Қазақстан облысының күндері аясында бақша өнімдері тегін таратылатындығы туралы ақпаратты жоққа шығарады», - делінген хабарламада.
Еске салсақ, жуырда жекелеген БАҚ-тар мен әлеуметтік желілерде Астанадағы Оңтүстік-Қазақстан облысының күндері 40 тонна қауын-қарбыз өнімін тегін таратудан басталатындығы туралы ақпарат тараған болатын.
ЭКСПО-2017 көрмесі аясында ұйымдастырылып отырған оңтүстік өңірдің Астанадағы мәдениет күндері 29 тамыз - 3 қыркүйек аралығында өтеді. Бағдарламада «Қазыналы Оңтүстік» қолөнер шеберлерінің көрмесі, концерттер, анимациялық және көркем фильмдердің көрсетілімі күтілуде. Қойылымдарды Ж. Шанин атындағы облыстық академиялық театр, облыстық орыс драма театры, сатира және әзіл-оспақ театры, қуыршақ театры және «Оңтүстік-цирк» әртістері қояды.
