Астанада Тұран даңғылы жөндеу жұмысына байланысты уақытша жабылды
АСТАНА. KAZINFORM – Астана қаласының Көлік және жол-көлік инфрақұрылымын дамыту басқармасы Тұран даңғылының Сарайшық көшесінен Керей Жәнібек хандар көшесіне дейінгі аралығына орташа жөндеу жүргізеді, деп хабарлайды елорда әкімдігінің ресми сайты.
Осыған байланысты, 30 мамырдан 8 маусымға дейін аталған учаскедегі қозғалыс ішінара кезең-кезеңімен жабылады. Бұл ретте көлік қозғалысы қаладан әуежайға қарай бір бағытта ұйымдастырылатын болады.
Осы орайда 2023 жылы Тұран даңғылы Тұлпар көпірінен Сарайшық көшесіне дейінгі учаскесінде, сол сияқты 2024 жылы Керей Жәнібек хандар көшесінің Жұлдыз айналымына дейінгі учаскесінде жұмыс жүргізілгенін естеріңізге саламыз.
Жүргізушілер мен жаяу жүргіншілер қозғалыс бағытын алдын ала жоспарлауы және ықтимал өзгерістерді ескеруі қажет. Қауіпсіздікті қамтамасыз ету және қолайсыздықты азайту үшін уақытша жол белгілері мен көрсеткіштер орнатылады.
Бұған дейін Алматыда Абай даңғылын ұзарту жұмыстары аяқталғанын хабарлаған едік.
