Астанадағы дәмханада жаппай улану: Тексеріс нәтижелері белгілі болды

АСТАНА. KAZINFORM — Астанадағы «Koktem» дәмханасының басқарушы директоры Данияр Байтоқов жаппай улануға себеп болған – санитарлық талаптарға сай келмейтін шикі ет партиясы екенін хабарлады.

Еске сала кетейік, 17 сәуірде Астанадағы танымал дәмханалардың бірінде 10 шақты адам уланған болатын.

— Біз зертханалық талдау нәтижелерін алдық. Дәмханамызға санитарлық нормаларға сай келмейтін өнім жеткізілгені анықталды. Сонымен қатар, асханамыздың толықтай таза екені туралы қорытынды да қолымызға тиді. Нақты улану көзі – сырттан жеткізілген шикі ет. Қазір Астана қаласы полиция департаменті мен СЭС бірлесіп ресми тергеу жүргізіп жатыр. Біз тиісті органдармен ашық жұмыс істеп, барлық қажетті ақпаратты бердік, — деп мәлімдеді Данияр Байтоқов Instagram парақшасында.

Ол қабылданған шаралар туралы да айтты:

• Барлық өнім жойылды;

• Барлық жабдық пен үй-жайлар толықтай жуылып, тазаланып, дезинфекцияланды;

• Шикізатты қабылдаудан бастап, тағам дайындауға дейінгі барлық кезең қайта тексерілді;

• Санитарлық талаптар күшейтіліп, қызметкерлер қайта оқытылды;

• Штатқа санитар дәрігер енгізілді;

• Барлық аймақтар кәсіби түрде химиялық өңдеуден өткізілді.

— Біз дәмхананы барлық процестердің 100% қауіпсіз екеніне көз жеткізгеннен кейін ғана қайта ашамыз. Біз сенімді ақтамадық және бұл үшін жауаптымыз. Болған оқиғаны өзгерте алмаймыз, бірақ бұдан былай мұндай жағдайдың қайталанбауы үшін бар күшімізді саламыз, — деді Байтоқов.

Бұған дейін бұл оқиғаға байланысты сотқа дейінгі тергеу басталғаны хабарланған.