Астанадағы дүкеннде адам денсаулығына қауіпті нан қоспасы анықталды
«ҚР Денсаулық сақтау министрлігінің Қоғамдық денсаулық сақтау комитеті Астана қаласындағы «Домашний продукт» супермаркетінде (38 көше, 4 үй) өнімнің қауіпсіздігіне мониторинг жүргізу барысында құрамында бидай ұны, жүгері крахмалы, ашытқы, тұз және қара бұрыш салынған «Кляр» сауда атауы бар адам денсаулығына қауіпті нан қоспасын анықтады», - делінген хабарламада.
Зертханалық сараптама нәтижесі өнімде генетикалық түрлендірілген сояның сандық құрамы 7-ден 110 есеге дейін, сондай-ақ құрамы 0,9% рұқсат етілген жағдайда жүгерінің 1,6% - ға дейін артуын анықтады.
Сонымен қатар, өнім қаптамасында гендік-түрлендірілген ингридиенттердің құрамы туралы ақпарат көрсетілмеген.
Естеріңізге сала кетейік, азық-түлік өнімдеріндегі генетикалық түрлендірілген ағза құрамының рұқсат етілген нормасы Алиментариус кодексінің Халықаралық тамақ стандарттарына сәйкес 0,9%-дан аспайды және ол міндетті түрде қаптамада көрсетілуі тиіс.
Аталған өнімнің өндірушісі-Оңтүстік Корея компаниясы «Nulpureun Co.Ltd» ЖШҚ импорттаушы «ҚОФ» (Ресей Федерациясы).
Қазіргі уақытта санитариялық-эпидемиологиялық орган өнімді анықтау және айналымнан алып тастау жөнінде қажетті шаралар қабылдауда.
Дүкен сөрелерінде аталған сәйкес келмейтін өнімдер анықталған жағдайда жазбаша немесе 8 (7172) 74-27-04 нөмірі бойынша комитетке немесе оның аумақтық департаменттеріне (kooz.dsm.gov.kz/ru сайтында көрсетілген) жүгінуге болады.