Астаналық боксшылар Варшавада өткен халықаралық турнирдің бас жүлдесін олжалап қайтты

АСТАНА. Мамырдың 5-і. ҚазАқпарат /Гүлмира Әлиакпарова/ - Өткен сәуір айының соңғы күндері Польша астанасы Варшавада өткен Феликс Штамды еске түсіруге арналған «А» санаты бойынша бокстан халықаралық турнирден астаналық спортшылар бас жүлдені қанжығаларына байлап қайтты.

Саналы ғұмырын тұтастай поляк боксының көсегесін көгертуге арнаған Ф.Штамның есімі жанкүйерлерге жақсы таныс. 1936-1968 жылдар аралығында жеті бірдей Олимпиада ойындарына қатысқан Штамның шәкірттері 6 алтын, 7 күміс және 9 қола медальді олжалады. Кәсіпқой боксшының еңбегін ұлықтауға арналған халықаралық турнир ұзақ жылдар ішінде дәстүрге айналды.
Тартысты дода нәтижесінде 1-ші орынды Қазақстанның ұлттық құрамасының сапында қатысқан - С.Сейфуллин атындағы Қазақ агротехникалық университетінің 1-курс студенті Данияр Елеусінов, 2-ші орынды - аталмыш университеттің 4 курс студенті Данияр Төлегенов жеңіп алды.