Атырау мектептерінің асханасында 71 мыңнан астам оқушыға диеталық тамақ беріледі

АТЫРАУ. KAZINFORM – Атырау облысындағы мектептердің асханасынан 71 мыңнан астам оқушы тегін тамақ ішеді. Тегін тамақтың орташа құны – 600 теңге.

Атырау облыстық Білім басқармасының бөлім басшысы Дулат Хамзиннің мәліметінше, бастауыш сыныптарда оқитын 60 мыңға жуық оқушы тегін тамақ ішеді. Сондай-ақ 11 мыңнан астам шәкірт 5-11-сыныптарда оқиды. Олар – әлеуметтік тұрмысы төмен отбасылардың балалары.

– Атырау облысында бір оқушыға ас мәзірі бойынша қарастырылған тамақтандырудың орташа құны – 600 теңге. Тегін ыстық тамақпен 33 жеке кәсіпкер қамтамасыз етеді. Олардың жұмысы «Catering Atyrau» тамақтандыру қауымдастығына біріктірілді. Аталған қауымдастық әкімдікпен бірлескен тиісті жұмыстарды атқарып, қауіпсіздік талаптарын толық сақтап келеді, - дейді Дулат Хамзин.

Оның дерегіне қарағанда, мектептерде тамақ беру мәселесін және тағам сапасын қадағалау үшін 224 бракераждық комиссия жұмыс істейді. Биыл жеті аудандық, бір қалалық, бір облыстық ведомствоаралық сараптамалық топ құрылған.

Асхана менеджері Райхан Абдрахманованың айтуынша, оқушыларға тек диеталық тағамдар ұсынылады. Мұндай тағам балалардың дұрыс тамақтануы мен қауіпсіздігі үшін қажет.

– Бүгінгі ас мәзіріндегі ыстық тағамда көкөніс бұқтырмасы, сусын ретінде С дәрумені қосылған кисель, бидай ұнынан пісірілген нан бар. Бұл тағамдар әр балаға жас ерекшелігіне сай өлшеніп беріледі. Мәселен, 1-4 сынып оқушыларын 200 грамм, 5-11 сыныптағыларды 250 грамм ыстық тағаммен қамтамасыз етеміз, - дейді Райхан Абдрахманова.

Балалары тегін ыстық тамақ ішетін ата-ананың қатарында Алтынай Наурызбаева да бар. Ол күнде ас мәзірін кестеден көреді.

– Тегін тамақтану жобасы мектеп ата-аналарына ұнайды. Күнделікті ас мәзірін арнайы кестеден көреміз. Бұл балаларымыздың қандай тамақ ішетінін білуімізге жол ашты. Қатарластарымен мектептен тамақ ішу әр баланың тамақтану мәдениетінің қалыптасуына ықпал етеді, - деді Алтынай Наурызбаева.

Еске сала кетелік, бұдан бұрын Маңғыстаудың Бейнеу ауданында 11 бала бірдей диагнозбен ауруханаға жеткізілгені хабарланған еді.