Атырау МӨЗ үлесін сатуға қатысты келіссөз жүріп жатқан жоқ — Асхат Хасенов

АСТАНА. KAZINFORM — Атырау мұнай өңдеу зауытының үлесін сату қаралып жатқан жоқ. Бұл туралы «ҚазМұнайГаз» ҰК» АҚ басқарма төрағасы Асхат Хасенов мәлім етті. 

Астана халықаралық форумы аясында тілшілер ҚМГ басшысынан Атырау мұнай өңдеу зауытының үлесін ресейлік компанияның жекешелендіруі мүмкіндігі туралы сұрады.

Өз кезегінде Асхат Хасенов қазіргі кезде Атырау МӨЗ-і ҚМГ иелігінде екенін айтты.

— Кез келген ұсыныс болса, біз оны пысықтап, қараймыз. Дәл қазір зауыт штатты режимде жұмыс істеп тұр. Ешкіммен келіссөз жүргізіп жатқан жоқпыз, — деді «ҚазМұнайГаз» ҰК» АҚ басқарма төрағасы.

Еске салсақ, биыл көктемде Энергетика министрлігі «Татнефть» мұнай компаниясы мен Атырау мұнай өңдеу зауыты өндірістік тәжірибе алмасу аясында өзара іс-қимыл жасалғанын хабарлады. 

Осы орайда ведомство аталған зауыттың үлесін сату қаралмағанын растады.

Айта кетейік, «ҚазМұнайГаз» 2024 жылы 8,3 трлн теңге табыс көрген.