Атырау облысының Махамбет ауданында 66 егін алқабы тасқын су астында қалған

АТЫРАУ. KAZINFORM – Атырау облысының Махамбет ауданында 66 егін алқабы тасқын су астында қалған.

Махамбет ауданының әкімі Қайрат Нұрлыбаевтың айтуынша, тасқын судың салдарынан мал өсіретін 27 шаруа қожалығы зардап шеккен. Оның ішінде 1 өндірістік жылыжай құрылысы, 1 жылыжай, 1 ешкі сүтін өндіретін зауыт, 1 балық өсіру зауытының құрылысы және 4 демалыс орны бар.

«Зардап шеккен шаруашылық иелерінің шығыны толықтай өтеледі. Тасқын судың ағыны саябырлаған соң, арнайы комиссия құрылады. Комиссия мүшелері су астында қалған егін алқаптарына акт жасап, есебін жүргізеді», - деді Қайрат Нұрлыбаев.

Оның дерегіне сүйенсек, мал шығыны болмаған. Өйткен, су басуы мүмкін аумақтардағы қожалықтардың малы алдын ала бекітілген қауіпсіз жерге көшірілген. 

Қазір зардап шегу қаупі бар аумақта егін шаруашылығымен айналысатын 7, мал шаруашылығы бағытындағы 19 шаруа қожалығы қалып отыр. 

Еске сала кетелік, бұған дейін Атыраудағы Махамбет ауылына қауіп төнгенін хабарлаған болатынбыз.