Атырауда 72 млрд теңге бөлінген нысандар құрылысы мерзімінен неге кешіктірілді
АТЫРАУ. KAZINFORM – Атырау облысында құрылысы мерзімінен кешіктірілген 81 нысан бар. Олардың құрылысын жүргізуге 72 млрд теңге бөлінген.
Сыбайлас жемқорлыққа қарсы іс-қимыл агенттігі Атырау облыстық департаментінің басшысы Ерұлан Серікқалиевтің айтуынша, құрылыс саласында алаңдататын түйткіл бар.
– Ең басты түйткіл – әлеуметтік нысандар мен жолдардың құрылысын жүргізудегі сапасыздық. Департамент қызметкерлері құрылысы ұзаққа созылған нысандарға талдау жүргізді. Талдау кезінде нысандар құрылысының кешігуіне себеп болатын бірнеше сыбайлас жемқорлық тәуекелі анықталды.
Біріншіден, тапсырыс берушілер тарапынан тиісті бақылау болмаған.
Екіншіден, техникалық қадағалау жасалмаған.
Үшіншіден, мердігерлік компаниялар және мемлекеттік тапсырыс берушілер арасында үлесі бар.
Төртіншіден, мердігерлер арасындағы картельдік сөз байласу, жобалау-сметалық құжаттаманы түзету, қосымша бюджет қаражатын бөлу дерегі байқалды.
Бесіншіден, тиісті лицензиясы жоқ мердігерлердің жұмыстарды орындауы.
Алтыншыдан, құрылыс жобаларына жауапты бұрынғы шенеуніктердің кейіннен келісімшарт жасалған мердігерлік мекемелерге жұмысқа орналасу жағдайына ерекше назар аударылды», - дейді Ерұлан Серікқалиев.
Оның дерегіне сүйенсек, қазір Атырау облысында құрылысы кешіктіріліп, мерзімінде аяқталмаған 81 нысан бар. Сондай нысандардың жартысынан көбі Атырау қаласында орналасқан. Бұл – 48 нысан.
– Құрылысы кешіктірілген нысандарға 72 млрд теңге бөлінді. Осы кезге дейін 42,5 млрд теңгеден астамы ғана игерілді. Нысандардың бәрі – әлеуметтік салаға қажетті нысандар. Оның ішінде 35 тұрғын үй, 32 инфрақұрылымдық нысан, 4 мәдениет үйі, 3 спорт кешені, 5 мектеп пен 2 аурухана бар. Әлеуметтік салаға серпін берер нысандардың құрылысындағы ұзақ кідірістер қоғамның алаңдаушылығын тудырып отыр. Мұны сыбайлас жемқорлық пен жауапты органдардың әрекетсіздігінің ықтимал көрінісі ретінде бағалаған жөн, - дейді Ерұлан Серікқалиев.
Департамент басшысының айтуына қарағанда, жергілікті атқарушы органдарға анықталған сыбайлас жемқорлық тәуекелдерін жою бойынша ұсыныс енгізіліп отыр.
Біріншіден, құрылысы аяқталған, бірақ түрлі себеппен қабылданбаған нысандарды анықтап, түпкілікті шешімдер қабылдау қажет.
Екіншісі – келісімшартта көрсетілген міндеттемелерін орындамаған мердігерлерден тұрақсыздық айыбын өндіріп алу.
Үшіншіден, негізгі нысандардың құрылысын аяқтау үшін тендерлік рәсімдерді жүргізген жөн.
Төртіншіден, жосықсыз мердігерлерді тану туралы талап арыздардың берілуін бақылауды күшейту керек.
– Біздің ұсыныстарымыздың тиімді тұстары бар. Біріншіден, бұл шаралар құрылыстың кешіктірілуіне жол бермеуді қамтамасыз етеді. Екіншіден, бюджет қаражатын тиімді пайдалануды қамтамасыз етуге бағытталып отыр, -деп мәлім етті Ерұлан Серікқалиев.
Осылайша Атырау қаласындағы Ө. Атамбаев атындағы №8 орта мектепте жөндеу жұмысының сапасыз жүргізілгені анықталып отыр. Білім ордасындағы жөндеу жұмысы былтырғы жылдың соңында жүргізілген.
– Білім беру мекемелеріндегі жөндеу жұмыстардың ашықтығы мен сапасын қамтамасыз ету үшін қоғамдық мониторингті тұрақты жүргізудің маңызы зор. Сыбайлас жемқорлыққа қарсы қызмет еріктілері сондай мониторингтің бірі Ө. Атамбаев атындағы №8 мектепте 2024 жылдың соңында орындалған жөндеу жұмыстарының сапасын бағалау үшін жүргізді. Мониторинг кезінде бірқатар кемшілік анықталды. Атап айтқанда, қол жуғыштың үстіндегі кафельдерді, тактильді плиталарды орнату, қабырғаларды әрлеу және сырлау сапасыз атқарылған. Есік пен еден аралығында шектегіштер болмады. Соның салдарынан қабырға бүлінген, - деп хабарлады департаменттің баспасөз қызметі.
Сондай-ақ, мектеп аумағы көгалдандырылмағаны анықталды. Білім ордасының кейбір бөлмелеріндегі есіктер, унитаз қақпақтары, кіреберіс есіктер мен тақтайшалар сынған.
– Заң мен тәртіпті сақтау – өскелең ұрпақты оқыту үшін қауіпсіз және жайлы орта құрудың маңызды шартының бірі. Осы орайда білім беру мекемелеріндегі жөндеу жұмыстарының сапасы белгіленген стандарттар мен талаптарға сай болуы керек. Сол себептен, мониторинг нәтижелері бойынша жемқорлыққа қарсы еріктілер мектеп басшылығына анықталған кемшіліктерді жою жөнінде ұсыныстар берді. Мердігер компания басшылары ескертулерді ескеріп, бір ай ішінде жоюға уәде берді, -деп мәлім етті департаменттің баспасөз қызметі.
Еске сала кетелік, бұдан бұрын Атырауда 6 жыл бұрын басталған қалашық құрылысы әлі бітпегенін жазған болатынбыз.
