Атырауда мал мен ет өнімдерін құжатсыз сатқандарға 5 млн теңге айыппұл салынды

АТЫРАУ. KAZINFORM – Атырау облысында 134 адамның мал мен ет өнімдерін құжатсыз тасымалдап, сатқаны анықталды. Оларға салынған айыппұл көлемі 5 млн теңгеден асты. 

Атырау облыстық полиция департаментінің баспасөз қызметінен мәлім еткендей, «Мал ұрысы» жедел-профилактикалық іс-шарасы кезінде заңдылықты бұзғандарға әкімшілік хаттама толтырылған. 

– Жедел-профилактикалық іс-шара аясында мал және ет өнімдерін тасымалдайтын 2099 автокөлік, ет өнімдерін сататын 650 орын, 642 шаруа қожалығы тексерілді. Шалғайдағы учаскелерді, қыстақтар мен ұжымдық шаруа қожалықтарында тұрғындарға азаматтық, қызметтік қару мен оқ-дәрілерін сатып алу, сақтау, пайдалану және тасымалдау бөлігін бұзғаны үшін ҚР Әкімшілік құқық бұзушылық туралы кодексінің 484-бабымен 32 әкімшілік хаттама толтырылды. Мал мен ет өнімдерін құжатсыз тасымалдауға қатысты 111, ал мал мен ет өнімдерін құжатсыз сатуға байланысты 23 дерек анықталды. Заң талабын бұзған 134 адамға ҚР Әкімшілік құқық бұзушылық туралы кодексінің 406-бабына сәйкес 5 млн теңгеден астам айыппұл салынды, - деп хабарлады департаменттің баспасөз қызметі. 

Сондай-ақ аталған іс-шара барысында төрт түлікті иелерінің немесе олар уәкілеттік берген адамдардың қадағалауынсыз жаюдың 352 дерегі анықталған. 

Еске сала кетелік, бұдан бұрын Атыраудағы Жылыой ауданы шаруаларына төрт түлікті қауіпсіз аумаққа шығару ескертілгенін жазған едік.