Атырау облысында киікпен келген кене төрт түлікке қауіп төндірді

АТЫРАУ. KAZINFORM – Атырау облысының Құрманғазы ауданындағы Азғыр, Асан, Сүйіндік ауылдық округтерінде киіктен тараған кене төрт түлікті шағып жатыр. Бұл туралы шаруалар дабыл көтерді.

Атырау облыстық Ауыл шаруашылығы және жер қатынастары басқармасының мәліметінше, аталған ауылдық округтердің аумағында киік саны көбейген.

– Құрманғазы ауданында киік санының көбеюіне байланысты 4 сәуір күні арнайы топ жолға шықты. Топ құрамында Ветеринариялық бақылау және қадағалау комитетінің «Ветеринария бойынша референттік Ұлттық орталығы» РМК, Ветеринариялық бақылау және қадағалау комитетінің Атырау облыстық аумақтық инспекциясы, Атырау облыстық орман шаруашылығы және жануарлар дүниесі аумақтық инспекциясы ж»не Атырау облыстық Ауыл шаруашылығы және жер қатынастары басқармасының мамандары бар. Аталған аумақтағы шаруагерлердің шағымы бойынша киіктердегі кенелер ауыл шаруашылығы жануарларына көшіп, малдың денесінде шамадан тыс көбейген. Кененің бабезиоз (пироплазмоз), анаплазмоз және басқа да аса қауіпті аурулардың тасымалдаушысы болуы мүмкін екендігі айтылып отыр, - деп хабарлады облыстық басқармадан.

Осыған орай жоғарыда аталған мекеме мамандары аумақтағы киіктерден аса қауіпті ауруларға қарсы сынамалар мен патологиялық материалдар алынады. Материалдар сараптамаға жіберіледі.

– Алдағы аптада көршілес Батыс Қазақстан облысынан ғылыми қызметкерлерді шақырту көзделіп отыр. Олар Құрманғазы ауданындағы жайтты зерделеп, алдын алу шаралары жөнінде семинар-кеңестер өткізеді, - деп мәлім етті басқармадан.

Басқарманың мәліметіне сүйенсек, Құрманғазы ауданындағы үш ауылдық округте 169 мың 468 мал есепке алынған. Оның ішінде 27 мың 704 мүйізді ірі қара, 23 мың 171 жылқы, 1 055 түйе және 117 мың 538 қой-ешкі бар. Бұл – облыста тіркелген төрт түліктің 20 пайызы.

Еске сала кетелік, бұдан бұрын Атыраудағы Жылыой ауданы шаруаларына төрт түлікті қауіпсіз аумаққа шығару ескертілгенін жазған болатынбыз.