Атырауда жыл басынан бері мопед жүргізушілерінің кінәсінен 17 жол оқиғасы болған

АТЫРАУ. KAZINFORM – Атырау облысында жыл басынан бері мопед жүргізушілерінің кінәсінен 17 жол оқиғасы тіркеліп отыр.

Атырау облыстық жергілікті полиция басқармасының бастығы, полиция полковнигі Ерлан Биғамбаевтың мәліметінше, мопед жүргізушілері 371 рет жол ережесін бұзған. 

«Мопед жүргізушілерінің жол ережесін бұзу дерегіне талдау жасалды. Талдау сәйкес, олардың басым бөлігі жылдамдықты шамадан тыс асырады. Алдындағы көлікті басып озуға ұмтылады. Тіпті бағдаршамның қызыл түсіне тоқтамай, өтіп кетеді. Осындай себептермен мопед жүргізушілерінің кінәсінен 17 жол-көлік оқиғасы тіркелді», - дейді Ерлан Биғамбаев. 

Оның дерегіне сүйенсек, 12 жасөспірімнің құжатсыз мотокөлікті жүргізгені анықталған. Мотокөлік жүргізушілері ұшыраған жол апатынан 25 адам түрлі дене жарақатын алып, 1 адам қаза тапқан. 

«Мәселен, Қызылқоға ауданының Мұқыр ауылында рұқсат құжатынсыз мотокөлікті жүргізген 19 жастағы студент 4 жасар баланы қағып құлатқан. Басынан жарақат алған балақай ауруханаға жеткізілді. Ол әлі күнге дейін дәрігерлердің бақылауында алынып отыр. Ал, 17 жасар бозбала мопедпен 16 жасар бойжеткенді қағып, оқиға орнынан қашып кетті. Патрульдік полиция қызметкерлері аталған мопедтің қай бағытта бар жатқанын анықтап, тоқтатуға тырысты. Алайда, жасөспірім заңды талаптарды орындамады. Сол себептен, патрульдік полицейлер оны мәжбүрлі түрде тоқтатты», - деп хабарлады Ерлан Биғамбаев. 

Еске сала кетелік, бұдан бұрын Атырау полицейлері мопед жүргізушісін ұстау кезінде құлатып алғанын жазған едік.