Атырауда синтетикалық есірткі сатқан төрт ересек адам 10, бір жасөспірім 3 жылға сотталды
Атырау облыстық полиция департаментінің баспасөз қызметінен мәлім еткендей, биылғы қаңтарда синтетикалық есірткіні сатып жүрген 4 адам ұсталған.
«Есірткі қылмысына қарсы іс-қимыл және жергілікті полиция қызметі басқармасы қызметкерлері Атырау қаласында интернет желісі арқылы және жасырын тығу әдісімен синтетикалық есірткі заттарын сатумен айналысқан Тараз қаласының төрт тұрғынын ұстаған еді. 29, 22 және 19 жастағы күдіктілерден 1 келіден астам синтетикалық есірткі тәркіленді. Медициналық сараптама қорытындысына сәйкес синтетикалық есірткінің 655,0623 грамы «Альфа-PVP», ал, 482,6133 грамы мефедрон екені дәлелденді», -деп хабарлады департаменттің баспасөз қызметі.
Күдіктілерге қатысты ҚР Қылмыстық кодексінің 297-бабының 3-бөлігімен қылмыстық іс тергелген. Сот шешімімен Тараз қаласының төрт тұрғынына 10 жылға бас бостандығынан айыру жазасы берілді.
Сондай-ақ, наурызда есірткі жасырын орынға тығып жүрген кәмелетке толмаған жасөспірім анықталған.
«Қала аумағында синтетикалық есірткіні жасырын тығумен айналысып жүрген 17 жасар жасөспірімнен 26,7022 грамм «Альфа-PVP» синтетикалық есірткісі, изолентпен буылып-түйілген 16 орама тәркеленді. Жасөспірім әлеуметтік желідегі «OLX» парақшасы арқылы «Мефедрон» синтетикалық есірткісін жасырын орынға тығып, заңсыз жолмен ақшалай пайда табуды көздегенін мойындады», -деп мәлім етті департаменттің баспасөз қызметі.
Күдікті жасөспірім ҚР Қылмыстық кодексінің 297-бабының 3-бөлігімен кінәлі деп танылған. Сот шешімімен оған үш жыл мерзімге бас бостандығынан айыру жазасы тағайындалды.
Еске сала кетелік, бұдан бұрын Атырауда 6 айда есірткіні заңсыз сату, тарату қылмысымен 30 адам сотталғанын жазған едік.