Атырауда таэквондодан алғашқы Азия чемпионаты өтеді
АТЫРАУ. ҚазАқпарат - Атырауда таэквондодан ересектер арасында өтетін Азия құрлығындағы алғашқы ашық чемпионатқа 15 елдің спортшылары қатысуға өтініш білдірген, деп хабарлайды ҚазАқпарат тілшісі өңірлік коммуникациялар қызметіне сілтеме жасап.
7-9 қыркүйек күндері Атырау қаласында таэквондодан Азия құрлығындағы І Ашық Азия чемпионаты өтеді. Ересектер арасындағы турнирге 15 мемлекеттен 400-ге жуық спортшы қатысқалы отыр. Үш күндік додада Азия құрлығының үздіктері анықталатын болады. Жарыс 7 қыркүйек күні 9:00-де Мұз сарайында басталады. Сонымен қатар, Азия чемпионатының ізін суытпай, Атырау қаласында 9-11 қыркүйек күндері «KAZAKHSTAN OPEN - 2018» халықаралық турнирі өтеді.
Айта кету керек, өткен жылы Атырауда тұңғыш рет таэквондодан жастар арасындағы Азия чемпионаты ұйымдастырылды. Оған 26 мемлекеттен 500-ге жуық спортшы қатысты. Өткен чемпионаттың жоғары дәрежеде өтуіне орай Атырау облысы кезекті Азия чемпионатын өткізуге лицензия алған болатын.
