Ауғанстанмен арада тауар айналымы 3 млрд АҚШ долларына жетуі мүмкін – Серік Жұманғарин
АСТАНА. ҚазАқпарат – Қазақстан Ауғанстан арасындағы тауар айналымы 3 млрд АҚШ долларына жетуі мүмкін. Бұл туралы елордада өтіп жатқан Қазақстан мен Ауғанстан бизнес-форумында Премьер-Министрдің орынбасары – сауда және интеграция министрі Серік Жұманғарин мәлім етті, деп хабарлайды ҚазАқпарат тілшісі.
«Осы күндері болған келіссөздерді ескере отырып, бүгін форум алаңында 106 млн АҚШ доллары сомасына коммерциялық құжаттарға қол қою жоспарланған. Диалог алаңы жаңа жобаларға, одан әрі сауда-экономикалық ынтымақтастық бағыттарына негіз болды. Жақын арада елдеріміз арасындағы өзара тауар айналымын 3 миллиард долларға дейін арттыруға мүмкіндік береді», - деді С. Жұманғарин.
Оның айтуынша, Қазақстан мен Ауғанстан арасындағы тауар айналымы 2022 жылы іс жүзінде 1 млрд АҚШ доллары (987,9 млн. АҚШ долл.) белгісіне жетіп, 2021 жылғы көрсеткіштерден екі есе артты. Тауар айналымының 90% қазақстандық экспортқа, негізінен өңделген өнімге тиесілі. Елдер арасындағы сауда биылғы 6 айда 343,6 млн АҚШ долларын құрады, оның ішінде Қазақстан экспорты 334,5 млн долларға жетті.
