Ауыл шаруашылығы кооперативтерін ұйымдастыру тұрақты жолға қойылған - Толамисов

Сенатор Амангелді Толамисов бүгінде еліміздің әр аймағында ауыл шаруашылығын дамыту бойынша жоспарланған жұмыстар жүйелі түрде жүргізіліп жатқанын айтты. 

«Президенттің сайлауалды бағдарламасын іске асырудағы негізгі бағыттың бірі – ауыл шаруашылығын дамыту. Әсіресе, жайылым жерлері мен егістік алқаптарға бай аймақтардың ахуалын назарда ұстау аса маңызды. Олар еліміздің әр аймағының экономикасына, хал-ахуалына тікелей әсер ететін локомотив дер едім.

«Ауыл шаруашылығы экономиканың жаңа қозғаушы күшіне айналады. Алдағы жылдарда ауыл-аймақты өркендетуге басымдық береміз. Біз ауылдық жерді жұмыспен жаппай қамту үшін жағдай жасаймыз, ауыл тұрғындарының кәсіпкерлік бастамаларын қолдаймыз. Тұрғындарға жер қолжетімді болады. Ол үшін ірі жер иелерінен пайдаланылмайтын жер телімдерін мемлекет меншігіне қайтару жұмыстарын жандандырамыз», - делінген сайлауалды бағдарламада. Соған орай бүгінде жоспарланған жұмыстарды жүйелі түрде жүргізуге күш салудамыз. Әсіресе, су үнемдейтін тиімді технология енгізу жұмыстары, мелиорация және суару жүйесін қалпына келтіру мәселесіне баса назар аударылып жатыр. Ал, ауыл шаруашылығы кооперативтерін ұйымдастыру ауқымды жоба ретінде тұрақты жолға қойылған.

Ауыл – алтын бесік. Бұл сөздің мән-мағынасын бір кісідей қабылдағанымызбен, бүгінгі уақыт үшін ол аса ауқымды түсінік. Сөз басында атап өткендей, ауыл шаруашылығы елдің тыныс-тіршілігінің, экономикасының басты қозғаушы күші. Ауыл өркендеп, ел дами берсін!», - деді Амангелі Толамисов.