Ауыл шаруашылығы өнімдерін қайта өңдеуді дамытудың кешенді жоспары қабылданды

АСТАНА. KAZINFORM — Биыл елімізде азық-түлік өндірісін 4,5%-ға арттыру жоспары қойылды. Алдағы жоспар туралы Ауыл шаруашылығы министрінің орынбасары Ермек Кенжеханұлы айтып берді.

— Ауыл шаруашылығы саласын одан әрі дамыту мақсатында министрлік облыс әкімдіктерімен бірлесіп келесі міндетті орындау үшін шаралар қабылдап жатыр. Соның бірі егістік алқаптардың құрылымын әртараптандыру қажет, яғни монодақыл — бидай және суармалы дақылдар алқабын қысқартып, оның орнына кірісі жоғары дақылдарды көбейту қажет. Басты назар агротехнологияларды сақтауға, тыңайтқыштарды жеткілікті көлемде енгізуге, өсімдіктерді қорғау құралдарын қолдануға және техниканы жаңартуға аударылады, — деп сендірді Ермек Кенжеханұлы елордада өтіп жатқан дөңгелек үстел барысында.

Сонымен қатар вице-министр Үкімет экономика өсімін 7%-ға жеткізу міндетін қойғанын айтты. 

— Оның ішінде жоғары қосылған құны бар салаларды ілгері дамытып, қаржыландыруға басымдық беріледі. Осыған байланысты, 2025 жылы азық-түлік өндірісін 4,5%-ға арттыру жоспарланып отыр. Сонымен қатар ауыл шаруашылығы өнімдерін қайта өңдеуді дамыту жөніндегі 2028 жылға дейінгі кешенді жоспар қабылданды. Бұл жоспар қайта өңдеуді қолдаудың жаңа шараларын, жаңа өткізу нарықтарын ашуды, сондай-ақ отандық қайта өңдеумен айналысатын кәсіпкерлерді қолдау үшін қорғау шараларын енгізуді қарастырады, — дейді министрдің орынбасары. 

Бұған дейін Ермек Кенжеханұлы былтыр ауыл шаруашылығы өнімдері көлемі 13,7%-ға артып, сала үшін рекордтық маусым болғанын айтқан еді. 

Айта кетейік, бүгін елордада Біріккен Ұлттар Ұйымының азық-түлік және ауыл шаруашылығы ұйымы (ФАО) мен еліміздің ауыл шаруашылығы министрлігінің ұйытқы болуымен азық-түлік жүйелерін қайта құру бойынша әлеуметтік жобаларды талқылауға арналған дөңгелек үстел өтіп жатыр.