Ауылдық жерлерде жас мамандарға деген сұраныс 26 мың адамды құрайды

АЛМАТЫ. Мамырдың 25-і. ҚазАқпарат /Ербол Тұрымбетов/ - Ауылдық жерде жас мамандарға деген сұраныстың 60 пайызын медицина қызметкерлері құрайды. Бұл бүгін Алматыдағы Қазақтың Санжар Асфендияров атындағы ұлттық медицина университетінде «Дипломмен - ауылға» мемлекеттік жобасының таныстырылымында айтылды,

деп хабарлайды ҚазАқпарат.

Оны «Нұр Отан» ХДП «Жас Отан» жастар қанатының қалалық филиалы, Қазақстан ауыл жастары одағы және Қазақстан студенттер альянсы ұйымдастырды. 2008 жылдың қаңтар айынан басталған «Дипломмен - ауылға» мемлекеттік бағдарламасы бойынша осы уақытқа дейін 2 мың жас маман ауылға барған.

«Қазіргі таңда ауылдық жерлердің жас мамандарға деген сұранысы - 26 мың адамды құрайды. Олардың 60 пайызы медицина саласының қызметкерлері болып отыр. Сол себепті біз алғашқы қадамды сіздерден бастадық», дейді қалалық «Жас Отан» қанаты Бас хатшысының орынбасары Самғат Ермекбаев. Оның айтуынша, алдағы уақытта мұндай шараларды «Жас Отан» өзге жастар ұйымдарымен бірлесіп барлық оқу орындарында өткізуді жоспарлап отыр.