Әйел үш баласымен бірге елге жеткізілді, Сирияда әлі де 40 азамат қалып отыр
ӘБУ-ДАБИ. 30 мамыр. ҚазАқпарат - Соғыс өрті басылмай жатқан Дамаскіден Қазақстан Республикасының азаматы, Павлодар облысының тумасы Наталья Пеннер үш баласымен дін аман елге жеткізілді.
Бұл Ливанда уақытша тұрақтаған Сириядағы қазақстандық консулдық және ҚР-дің Бейрут қаласындағы дипломатиялық миссиясы қызметкерлерінің тікелей көмегінің арқасында іске асты.
Сирияда әлі де 40 азаматтың қалып отырғандығы қазақстандық консулдыққа белгілі болып отыр. Қарулы қақтығыс басталғаннан бері 200-ге жуық отандасымыз елге көшірілді. Басым бөлігі сәбилері бар әйелдер. Қазақстандық дипломаттар оларды елге аттандыру жұмыстарына жан-жақты көмек көрсетуде.
