Әйелдер арасында темекі шегушілік жылдан жылға артуда - баспасөз мәслихаты
Бұл туралы бүгін Алматыда Дүниежүзілік темекісіз күнге арналған «Қазақстандағы әйелдер арасындағы темекі шегушіліктің өсуі: ахуалы мен салдары» атты тақырыпта өткен баспасөз мәслихатында Салауатты өмір салтын қалыптастыру проблемалары Ұлттық орталығының директоры Сәуле Диқанбаева мәлім етті, деп хабарлайды ҚазАқпарат.
Оның айтуынша, темекі шегуші әйелдердің саны ерлермен салыстырғанда 2004 жылы 1-де 5-ті, бүгінде 1-де 3-ті құрайды, ал 13-15 жастағы топта - 1-де 2-ні құрайды. «10 жыл бұрын темекі шегуші ер балалар мен қыздардың ара салмағы 1-де 5-ті, кей жерлерде 1-де 10-ды құраған. Әйелдер арасындағы темекі шегушіліктің ең жоғары дәрежесі 18-19 жас (20%) және 20-29 жас (17,2%) топтарында анықталды», деді ол.
Сәуле Диқанбаеваның пікірінше, әйелдерді темекі шегушілікке қызықтыруда темекі компанияларының жарнамалық маркетингі үлкен рөл атқаруда. «Мысалы, соңғы жылдары Қазақстандағы темекі компаниялары сигареттердің «әйелдерге ғана» арналған әртүрін хош иістермен, сәнді әсем қаптамалармен, шығарып, тауар белгілерін 2 есеге өсіріп отыр».
Ол сонымен қатар, темекі шегетін әйелдер ерлерге қарағанда өкпе ауруларына бес есе жиі шалдығады, инфаркт миокарды, тахикардия (жүректің жиі соғуы) сынды жүрек ауруларына ұшырау қауіп- қатері артатындығын, сондай-ақ, ағзаның тез қартаюына әкеліп соқтыратынын айтты.
Дүниежүзілік денсаулық сақтау ұйымының деректері бойынша, әлемде әйелдердің 12 пайызы темекі шегеді. Темекі шегушіліктің әйелдер арасында ең көп тарағаны Данияда анықталған - 37 пайыз. Ең көп темекі шегушілер мекендейтін дамушы елдерде әйелдердің 7 пайызы темекі шегеді екен.