Азаматтық қоғам тұжырымдамасын жасауға әр азамат үлес қоса алады
АСТАНА. KAZINFORM — Азаматтық қоғамды дамытудың жаңа тұжырымдамасы әзірленбек.
Мәдениет және ақпарат министрлігі азаматтық қоғамды дамыту тұжырымдамасына өзгерістер мен толықтырулар енгізу бойынша белсенді жұмыс жүргізіп жатыр.
Аталған жұмыстың мақсаты — мемлекет пен азаматтық сектор арасында берік қоғамдық келісім орнату.
Бұл жұмысқа сарапшылар мен ҮЕҰ өкілдері қатысады.
Олар тұжырымдаманың бірінші кезеңінде жасалған жұмысты талдап, халықаралық тәжірибені сараптайды және әлеуметтік зерттеулер жүргізеді.
Министрлік осы жылдың тамызынан бастап, азаматтық сектордың негізгі сегменттері бойынша зерттеулер ұйымдастырады.
Қыркүйек және қазан аралығында ел өңірлерінде жария талқылау ұйымдастыру жоспарланған.
Сондай-ақ Қазақстандық қоғамдық даму институты сарапшылар мен ҮЕҰ өкілдерімен сұхбат жүргізіп, жаппай сауалнама жасалады.
Азаматтық қоғамды дамыту бойынша барлық ұсыныстар 2024 жылғы қазан айының соңына дейін төмендегі электронды поштаға қабылданады: a.kushkimbaev@mki.gov.kz, a.alzhaparova@kipd.kz.
