Балық шаруашылығы комитеті итбалықтардың құрлыққа шығып кетуін түсіндірді

АҚТАУ. KAZINFORM — 2025 жылдың ақпан айының соңы мен наурыз айының басында Каспий теңізінің солтүстік бөлігінде ауа мен су температурасының күрт төмендеуі тіркелді.

Сонымен қатар, осы кезеңде батыс бағыттағы желдер жағаға соғып, мұздардың ығысуына және олардың бір-біріне тығыз тақалуына ықпал етіп, итбалықтардың суға сүнгуіне мүмкіндік бермеген. Осылайша, ересек итбалықтар тамақтану мүмкіндігінен айырылды. Азық-түлік іздеген итбалықтар Қаражанбас және Қаламқас кен орындары жанындағы жағалауға шығып кетіп, бағдарын жоғалтып алған.

— Осыған байланысты, Жайық-Каспий облысаралық балық шаруашылығы бассейндік инспекциясының мемлекеттік инспекторлары Маңғыстау облысы әкімдігінің өкілімен бірлесіп осы өңірге барды. Айта кету керек, ауа-райының қолайсыздығы (қар, күшті жел, боран) ол жерге баруды қиындатты. Ол жерге келгеннен кейін жағдайды бағалау жүзеге асырылады және адасқан итбалықтарды табиғи ортаға қайтару бойынша шаралар қабылданады, — делінген хабарламада.

Бұған қоса, жергілікті атқарушы органдардың, қоғамдық бірлестіктердің және бұқаралық ақпарат құралдарының өкілдерімен бірлесіп, алдағы күндері әуе көлігін пайдалана отырып, өңірді айналып өту жоспарда. Жағдай ҚР Ауыл шаруашылығы министрлігінің бейінді ведомствосының бақылауына алынған.

Бұған дейін, кен орындары аумағынан 11 итбалық табылғанын жазған едік.