Банк алдындағы борышы 2,1 млрд теңгеге жеткен астаналық тұрғын банкроттық рәсімдей алмай жүр

АСТАНА. KAZINFORM – Мемлекеттік кірістер комитеті төрағасының орынбасары Сейілжан Ахметов жеке тұлғаларды банкрот деп тану шараларының аралық қорытындыларын баяндады.

- Алматы облысында ең көп өтініш берілген – 23 640 ең азы – Ұлытау облысында – 1 924. Бұл осы аймақтардағы халықтың тығыздығына байланысты. Банкроттардың орташа жасы – 44 жас. Ең жасы үлкен банкрот – 1943 жылы туған Шымкент қаласының тұрғыны, берешек сомасы 370 мың теңге. Ең жас банкрот – 2005 жылы туған Астана қаласының тұрғыны, берешек сомасы 856 мың теңге, - деді ол орталық коммуникациялар қызметінде өтіп жатқан баспасөз мәслихатында. 

Оның айтуынша, банкроттыққа жүгінетіндердің басым бөлігі ер азаматтар. Банкрот деп тану туралы өтініштердің 52%-ын ер адамдар түсірген.

- Берешегі ең көп банкрот Астана қаласының тұрғыны болды. Қарыз сомасы 2,1 млрд теңгеге жеткен. Бүгінгі таңда оны банкрот деп тану туралы шешімге кредитор шағымданып, сотта қаралуда және бұл сома 2007 жылы алынған несиелік қарыздың бағамдық айырмашылығына байланысты ұлғайып кеткен, - деді Сейілжан Ахметов

Сондай-ақ, ол банкрот деп танылған азаматтардың 5%-ы (1342) азамат мемлекеттен атаулы әлеуметтік көмек алатынын айтты. Ал 9 891 адамның (44%) 5 жылдан астам уақыт бойы төленбеген қарызы болған.

Бұған дейін Атырау облысында жыл басынан бері 252 дәрменсіз борышкер банкрот деп танылғанын жазған едік.