Батыс Қазақстанда аудан әкімдері есеп беруде

ОРАЛ. 24 қаңтар. ҚазАқпарат /Елжан Ералы/ - Батыс Қазақстан облысында аудандар әкімдері есеп беруде.

Ақжайық ауда­ны­ның әкімі Абай Иманғалиев тұр­ғын­дар­ға биылғы есеп беру кездесулерін Алға­бас ауылынан бастады. Бұл - бес бө­лім­шесі, 38 мал қыс­тағы бар, яғни осы­лар­дың саны жө­ні­нен аудан бо­йын­ша алда тұрған ауыл-аймақ.

Әкім өз баяндамасында атап көр­сеткеніндей, мемлекеттің үздіксіз қамқорлығын және облыс әкімі Бақтықожа Ізмұхамбетовтің ірі­лендірілген үлкен ауданға күн­делікті назарын халық жақсы біліп, бағалап отыр. Айталық, ауданда өткен жылы 774 жұмыс орны ашылып, 503 адам тұрақты жұмысқа орналасты. Асыл тұқымды мал ша­руа­шылықтарының са­ны алтыға жетті.

«Қазақтелеком» АҚ облыстық ­фи­лиа­лының бағдар­ла­ма­сы­на сай аудан көлемінде СДМА - 450 қондырғысы арқылы 825 телефон нүктесі орнатылды, сандық стансалар бой көтерген төрт ауылдың бірі - осы Алғабас. Мұнда 19 қыстақ сымсыз терминалмен қамтылды. Таяуда «Bee­line» мұнарасы да іске кі­ріс­пек.

Баяндамада А.Иманғалиев орындалған басқа да сан қырлы істерді қысқа да нұсқа жеткізе келіп, негізінен таяу кезеңдегі міндеттерге басым тоқталды, кемшіліктерді ашып айтты.

Ауданда қазір 10 дәрігер жетіспейді. Медицина саласы мамандарын даярлайтын оқу орындарында осыдан бес жыл бұрын ауданнан оқитындар саны 38 болса, қазір - 174. Осы үлкен күшті ауылға тарту да қаперден түспегені жөн. Сонымен қатар ғимараттары күрделі жөндеуден өткізілген дәрігерлік амбулаториялар (оның бірі Алғабаста), медбекеттер қызметіне соны тыныс беру керек. Ауданда өткен жылы медициналық құрал-жабдық алуға 4,3 млн. теңге бөлінді, ақ желеңді жандар қатарына келген 12 дәрігер баспанамен қамтылды. Осындай жақсылықтар желісі жалғасуы үшін барлық жерде мүдделі көзқарас, мығым мақсат керек.

Сырым ауданы әкімі Ерлан Нысанғалиев Бұлан ауылдық округінде тұрғындармен кездесті.

Аудан басшысының бұлан­дықтармен жүздесуі кезінде пі­кір алмасу халық пен билік ара­сын жақындата түскені анық бай­қалды. Өйткені ха­лық көп­теген шаруалардың ат­қа­рыл­ғанын көріп, тұрмыс-тіршіліктің жеңілдей түскенін нақты сезініп отыр. Соның бір айғағындай биыл Бұлан ауылына газ тартылмақ.

Аудан орталығынан 12 ша­қы­рым жерге орналасқан Бұ­лан ауылдық округінде соңғы жыл­да­ры жаңа үлгіде са­лын­ған орта мектеп бой кө­тер­ген, мә­де­ни­ет үйі мен фельдшерлік пункт күрделі жөндеуден өтті. Телефон байланысының жұ­мы­сы жолға қойылған. Таза су бағ­дар­ла­ма­сы мен ауылға тұщы ауызсу келді.

Шідерті өзенінің жағасындағы ауылдың көшелеріне түнгі электр шамдары орнатылған. Халық тұ­ты­натын тауарлардың бағасы бас­қа округтерге қарағанда арзан.

Жиында сөз алғандар өз күштерімен шарбақтарына су тартып, бау-бақша егіп, тал-терек отырғызатындарын тіл­ге тиек ете келе, Бұлан ауы­лы­ның орталығынан саябақ ашып, онда майданнан орал­ма­ған боздақтардың аты-жөні жазылған мәрмәр тақта орна­туға және Самара-Шымкент тас жолына қосатын 2 шақырым грейдерге асфальт төсеуге аудан әкімінің жәрдемдесуін сұрады.

Аудан, қала әкімдерінің есептік кездесулері жалғасуда.