Батыс Қазақстанда «Бекіре-2012» шарасы барысында заңсыз балық аулағандар құрықталды
ОРАЛ. 28 мамыр. ҚазАқпарат - «Бекіре-2012» жедел алдын алу шарасы барысында облыстық ішкі істер департаменті табиғат қорғау және малдәрігерлік полиция бөлімінің қызметкерлері мен Жаңақала ауданының учаскелік инспекторлары Еділсор көлінде уылдырық
шашу мезгілінде заңсыз балық аулаған сегіз адамды құрықтады.
Облыстық ішкі істер департаментінің баспасөз қызметінен хабарлағанындай, олардың арасында Орал қаласы, сондай-ақ Жаңақала ауданының тұрғындары болған. Полиция үш екі кісілік резеңке қайықты, 180 метр ауды және 234 келі қара балықты тәркіледі.
