Батыс Қазақстанда халық саны 614 мыңға жуықтады
ОРАЛ. 14 мамыр. ҚазАқпарат - Батыс Қазақстан облысында 613,9 мың адам тұрса, соның 299 мыңы (48,7%) қаланы, 314,9 мыңы (51,3 %) ауылды мекен етеді.
Облыстық статистика департаментінен түскен мәліметке қарағанда, биылғы бірінші тоқсанда облыс халқы 1334, соның ішінде қалалықтар 1934 адамға көбейсе, есесіне ауыл тұрғындары 600-ге азайды.
Өңірде дүниеге келген сәбилер өткен жылға қарағанда көбейіп отыр. Айталық, бірінші тоқсанда 2899 нәресте өмір есігін ашты, бұл өткен жылғыдан 2,4 пайызға көп. Соның 1483-і немесе 51,2%-ы Орал қаласында дүниеге келді.
Облыста үш айда 1434 адам өмірден өтті, бұл өткен жылғыдан 67-ге немесе 4,5 пайызға аз.
