Батыс Қазақстанда көктайғаққа байланысты жол жабылды
ОРАЛ. ҚазАқпарат - Батыс Қазақстан облысында көктайғаққа байланысты жол жабылды, деп хабарлайды ҚазАқпарат тілшісі.
БҚО жолаушылар көлігі және автомобиль жолдары басқармасынан түскен мәліметке қарағанда, ауа райының нашарлауына орай жергілікті сағат 19.30-дан бастап облыстық маңызы бар Чапаев-Жаңақала-Сайқын жолында барлық көлік түрлері үшін қозғалысқа шектеу қойылды.
"Қазақавтожол" ЖШС БҚО филиалының мәліметі бойынша бұрқасын мен тұманға байланысты сағат 21.00-ден бастап "Самара-Шымкент" (РФ шекарасы - Орал қаласы), "Самара-Шымкент" (Подстепный ауылы - Ақтөбе облысының шекарасы), "Орал-Тасқала-РФ шекарасы" жолдары да жабылды.
Осыған байланысты тұрғындарға СМС-хабарламалар жіберілді.
ТЖ департаментінің баспасөз хатшысы Жәдігер Құсайыновтың айтуынша, 12 қаңтар күні осындай ескертуге қарамастан, жолға шығып кеткен бірқатар тұрғындар көліктерімен қар құрсауында қалды.
Атап айтқанда, сағат 10.00-де Тасқала-Орал жолы бойында батып қалған 5 автокөлік (13 адам) шығарылды. Оған қоса Тасқала-РФ шекарасы жолының 7-шақырымында 2 автокөлікке (10 адам) де осындай көмек көрсетілді.
«Қазгидромет» РМК БҚО филиалының мәліметі бойынша 13 қаңтар күні де облыстың кей жерлерінде тұман түсіп, бұрқасын көтеріліп, көктайғақ болады. Солтүстік-батыстан соғатын желдің жылдамдығы секундына 9-14, кей жерлерде 15-20 метрге дейін жетеді.
Орал қаласында да ауа райы бұзылып тұр.
Еске сала кетейік, бұдан бұрын да өңірде тұман түсіп, көктайғақ болатыны, жолдардың жабылғаны туралы хабарланған еді.
