Батыс Қазақстанда көп балалы аналарға «Алтын алқа» және «Күміс алқалар» тапсырылуда

ОРАЛ. Ақпанның 25-і. ҚазАқпарат /Елжан Ералы/ - Батыс Қазақстан облысында көп балалы аналарға «Алтын алқа» және «Күміс алқалар» тапсырылуда,

деп хабарлайды ҚазАқпарат тілшісі.

Осындай рәсімдер Ақжайық ауданының бірнеше ауылында өткізілді. Мерген, Мойылды, Жайық ауылдарында аудан әкімі Абай Иманғалиев жеті және алты бала тапқан аналарға «Алтын алқа» мен «Күміс алқаны» табыс етті. Жаңабұлақ, Қабыршақты ауылдарының көп балалы аналары да құрметке бөленді. Сондай-ақ Ұлы Отан соғысы ардагері, Беларусь елін азат етуге қатысқан мергендік Бақтыгерей Қатиннің өңіріне мерейтойлық медаль тағылды. Осындай медаль чапаевтық Бақтығали Сәрсекеновке де тапсырылды.

Облыс аудандары мен Орал қаласында жеті және алты бала тапқан аналарға «Алтын алқа» мен «Күміс алқаны» табыс ету, сонымен қатар оларды осы марапатқа ұсыну шаралары жалғасуда.