Батыс Қазақстанда құны 4,6 млрд. теңгені құрайтын 13 жоба талқыланды
ОРАЛ. 20 наурыз. ҚазАқпарат - Облыс әкімінің орынбасары Алтай Көлгіновтің төрағалығымен өткен аймақтық үйлестіру кеңесінің кезекті отырысында несиелерінің жалпы шамасы 4,6 млрд. теңгені құрайтын жаңа 13 жоба қаралды.
«Бизнестің жол картасы - 2020» бағдарламасы аясында көлік, спорт, білім беру, құрылыс материалдары өндірісі, өңдеу өнеркәсібі, қызмет көрсету салалары бойынша жобалар талқыланды.
«Жаңа бизнес бастамаларды қолдау» бағыты бойынша «Оралмұнайгазгеология» АҚ-ның «Бұрғылау құбырларын және бұрғылау қондырғысын сатып алу» және «Болашақ-Т» ЖШС-ның «Арнайы техниканы, жабдықтарды сатып алу, үй комбинатын салу» жобалары бойынша несиенің пайыздық мөлшерлемесін субсидиялау мәселесі қаралып, мақұлданды. «Болашақ-Т» ЖШС басшысы Қайдар Қошановтың сөзіне қарағанда, үй комбинатының құрылыс материалдарын құрылысқа пайдалану мемлекеттік бағдарлама бойынша салынып жатқан қазір үй бағасын 10-15 пайызға төмендетуге мүмкіндік береді. Сондай-ақ құрылыс индустриясы саласындағы «СВ плюс» ЖШС-ның «Жабын тастар және тауарлық бетонды шығару мақсатында жабдықтарды құрастырумен байланысты мүлікті (жер телімдері, қоймалар, өндірістік база) сатып алу» жобасы бойынша несиесінің пайыздық мөлшерлемесі субсидияланатын болды.
«Gaudeamus» ЖШС-ның «Білім беру бойынша қызметтерді көрсету үшін коммерциялық жылжымайтын мүлікті сатып алу», «Дestination» ЖШС-ның «Ағылшын тіліне оқыту бойынша оқу орталығын ашу үшін коммерциялық жылжымайтын мүлікті сатып алу» жобалары мақұлданды.
«ПластСпецСтрой» ЖК-нің «Автокөлік жолдарын пайдалану үшін арнайы техниканы сатып алу», «Родник» фирмасы» ЖШС-ның «Жүкті тасымалдау үшін автокөлікті сатып алу», «Швецов Б.В.» ЖК-нің «МАЗ-975830-3021 жартылай тіркемені және маркасы МАЗ-544008-060-031 сүйреуіш тартқышты сатып алу», «Regional Support Kazkhstan» ЖШС-ның «Маркасы НЕФАЗ 9334-20-01 жартылай тіркемесі бар КамАЗ 54115-010-15 автокөлігін сатып алу» жобалары кәсіпкерлерге істерін дамытуға қажетті. Сондықтан техникамен қамтамасыз ететін жобалар кеңес отырысында қолдау тапты.
«Нафта» сауда үйі» ЖШС-ның «Энергия» фитнес-орталығы ғимаратына жапсарлас салынған спорт залды электр және жылу қуатымен қамтамасыз ету үшін трансформатор және от жағу кіші стансасын қайта құру», «Риа Мир» ЖШС-ның «Балаларға арналған «Космик» ойын-сауық орталығын ашу үшін жабдықтарды сатып алу» жобалары бойынша оң шешім шығарылды. «Пассажир-авто» ЖШС-ның «Автокөлікті сатып алу (2012 жылы шығарылған ГАЗ 322132-2288 шағын автобустар)» жобасы мақұлданып, несиенің пайыздық мөлшерлемесі субсидияланатын болды.
Аймақтық үйлестіру кеңесінде «Абдулин» С.А» ЖК-ның жүк көлігін сатып алу жобасын талқылау банк өкілінің басқосуға келмеуіне байланысты кейінге қалдырылды.
