Батыс Қазақстанда «Жол картасына» сәйкес 8859 жаңа жұмыс орны ашылды
ОРАЛ. Қарашаның 27-сі. ҚазАқпарат /Ғайсағали Ералы/ - Батыс Қазақстан облысында «Жол картасы» аясында 79 жобаны жүзеге асыруға 4 млрд. 977 млн. теңге бөлініп, 8859 жаңа жұмыс орны ашылды.
Облыс әкімі Бақтықожа Ізмұхамбетовтің ҚазАқпарат тілшісіне мәлім еткеніндей, облыста жұмыспен қамтудың 2008-2010 жылдарға арналған аймақтық бағдарламасы табысты жүзеге асырылуда, экономикалық белсенді халық саны өсуде. Күні бүгін жұмыссыздық деңгейі 0,7 пайызды құрап, жыл басындағыдан 0,2 пайызға төмендеді. Қарашаның 1-індегі мәлімет бойынша 2397 жұмыссыз есепте тұр.
«Жол картасына» сәйкес 487 облыстық және қалалық кәсіпорынмен келісім-шарт жасалып, ашылған әлеуметтік жұмыс орындарына 4682 адам (соның ішінде жұмыспен қамтудың аймақтық бағдарламасына сәйкес - 1091, «Жол картасы бойынша - 3591) жіберілді, бұл 2008 жылмен салыстырғанда 4 есеге артық. Жастар тәжірибесін ұйымдастыру үшін 621 кәсіпорынмен келісім-шарт жасалып, 2389 адам қамтылса, соның 885-і ауылдық жерлерден болып отыр.
